కాంగ్రెస్‌కు జీవన్ రెడ్డి 'గుడ్ బై'? రంజాన్ వేళ బీఆర్ఎస్ నేతలతో కలిసి ప్రార్థనలు!

ఉమ్మడి కరీంనగర్ జిల్లా రాజకీయ ఉద్ధండుడు, ఎమ్మెల్సీ జీవన్ రెడ్డి రాజకీయ ప్రయాణం ఇప్పుడు ఒక కీలక మలుపు వద్ద నిలుచుంది. గత కొంతకాలంగా కాంగ్రెస్ నాయకత్వంపై అసంతృప్తితో ఉన్న ఆయన, నేడు రంజాన్ పర్వదినం సందర్భంగా బీఆర్ఎస్ నాయకులతో కలిసి ప్రార్థనల్లో పాల్గొనడం రాజకీయ వర్గాల్లో పెను సంచలనం సృష్టించింది. కేవలం పండుగ శుభాకాంక్షలు చెప్పుకోవడమేనా? లేక ఇది 'గులాబీ' గూటికి చేరేందుకు వేసిన తొలి అడుగా? అన్న చర్చ ఊపందుకుంది.

జగిత్యాల ఎమ్మెల్యే సంజయ్ కుమార్ కాంగ్రెస్‌లో చేరినప్పటి నుండి జీవన్ రెడ్డి తీవ్ర అసహనంతో ఉన్నారు. దశాబ్దాలుగా పార్టీని నమ్ముకున్న తన కంటే, ఇతర పార్టీల నుండి వచ్చిన వారికే ప్రాధాన్యత ఇస్తున్నారని ఆయన సన్నిహితుల వద్ద ఆవేదన వ్యక్తం చేశారు. ఇప్పటికే తన నివాసం వద్ద కాంగ్రెస్ పార్టీ ఫ్లెక్సీలను తొలగించడం ద్వారా ఆయన తన నిరసనను బహిరంగంగానే వ్యక్తపరిచారు. పార్టీ కార్యక్రమాలకు కూడా ఆయన దూరంగా ఉంటున్నారు.

నేడు రంజాన్ ప్రార్థనల అనంతరం బీఆర్ఎస్ ముఖ్య నేతలతో జీవన్ రెడ్డి చాలా సేపు ఏకాంతంగా ముచ్చటించడం అందరినీ ఆశ్చర్యపరిచింది. సాధారణంగా ప్రత్యర్థి పార్టీ నేతలతో ఇంత ఆత్మీయంగా కనిపించడం వెనుక రాజకీయ వ్యూహం ఉందనేది విశ్లేషకుల అభిప్రాయం. ఇప్పటికే తన అనుచరులతో చర్చలు పూర్తి చేసిన జీవన్ రెడ్డి, త్వరలోనే తన భవిష్యత్తు కార్యాచరణను ప్రకటిస్తానని తెలిపారు.